Esta ruta comparte o primeiro tramo (o que vai pegado ao mar) co Camiño Natural do Cantábrico. Eu xa coñecía todo o que hoxe vin porque ese Camiño xa o percorrín todo e neste blog está recollido e a outra parte da ruta tamén a coñecía por estar cerca da parroquia onde vivo e percorrela xa varias veces. Faltábeme facer unha ruta circular unindo a zona marítima de Cangas coa zona non tan pegada ao mar e neste traxecto que hoxe fixen conseguino.Resaltar que esta NON é unha ruta de sendeirismo no estricto sentido da palabra xa que transcorre por paseo marítimo e asfalto na súa maioría; só un pequeno tramo vai por un camiño.
Características da ruta:
Lonxitude: 6,8 km.
Dificultade: fácil
Ruta circular só sinalizada no tramo que coincide co Camiño Natural do Cantábrico.
O meu track en WIKILOC:
Descripción:
Eu partín da praia de Os Xuncos, unha praia pequena na que para acceder hai que baixar (e despois subir, que é o peor) bastantes escaleiras. A min persoalmente gústame moito porque está bastante illada, non hai moita xente e ten moito encanto ao ser recóndita e con augas cristalinas. O peor é que apenas hai sitio para aparcar.
Na seguinte vemos a praia de Os Xuncos e o illote que vemos é Pena Orxal ao que se pode acceder en marea baixa.
 |
| Praia de Os Xuncos e ao lonxe Pena Orxal |
Neste mes de xuño, as flores están en pleno apoxeo.
 |
| Xardín en flor |
No medio dos cantís, aparece esta cala. A punta que se adentra no mar é a Punta de Riosmar
 |
| Cala de difícil acceso |
O Rego de Alemparte que cruza a parroquia de Cangas desemboca aquí, na praia de Riosmar:
 |
| Desembocadura do Rego de Alemparte |
Fermosa imaxe do Rego de Alemparte: |
| Rego de Alemparte |
A praia de Riosmar é un coído ou praia formada totalmente por pedras ou coios. Este recuncho solitario (o que non chegue o coche ata a mesma praia, o non estar sinalizada e non ter area fai que os únicos habitantes sexan as gaivotas)
A min encántame!!
 |
| Praia de Riosmar |
 |
| Praia de Riosmar |
Subimos agora por un estreito carreiro durante uns poucos metros:
 |
| Carreiro |
Desembocamos no Paseo Marítimo de Cangas. É un paseo moi curto pero con moito encanto, con recunchos moi fermosos.
 |
| Comenzo ou final do Paseo Marítimo de Cangas |
Esas moles rochosas que vemos son os chamados "Castelos"
 |
| Os Castelos |
Esta praciña, xunto ao coñecido restaurante de Casa Selmira, é a Praza de S. Pedro.Non só hai unha en Italia, no Vaticano; en Cangas tamén hai outra. É moito máis modesta pero ten o "seu aquel".
 |
| Praza de S. Pedro |
A Praia de S. Pedro ou dos Castelos está composta dunha mestura de coios, grava e area e o espazo útil de area varia moito segundo a marea estea alta ou baixa.Ten un difícil acceso por medio dunhas escaleiras estreitas.
 |
| Praia de S. Pedro ou dos Castelos |
A igrexa de S. Pedro de Cangas está situada nun promontorio rochoso onde se di que primeiro habitaron os fenicios e máis tarde os celtas. Nese lugar levantouse primeiro, no S. XIII unha igrexa e sobre esta, no S. XVII, a actual igrexa.
Ao longo dos séculos sufreu distintas reformas.
 |
| Igrexa de S. Pedro de Cangas e casa rectoral |
Diante da igrexa vemos unha moreira negra, unha árbore recollida na lista de "Árbores Senlleiras de Galicia".
Orixinaria de Asia, a moreira negra é cultivada no Mediterráneo dende hai séculos. As súas follas son usadas para alimentar os vermes de seda e o seu froito é comestible, rico en vitamina C. A cortiza da súa raíz foi usada historicamente como laxante e para problemas intestinais. A madeira é usada en ebanistería porque resiste ben a humidade.
 |
| Moreira negra. |
Este paseo ten de todo: ata ten unha pequena e fermosa área recreativa derriba do mar: |
| Área recreativa |
Esta área recreativa está entre a Punta dos Castros e a Punta de Perverso. |
| Área recreativa |
Sempre vira esta área recreativa dende arriba, dende o paseo; desta vez baixei e descubrín estas escaleiras nunha baixada cara ao mar pero nun momento dado interrúmpese a baixada por uns felgos enormes.
 |
| Baixada á fonte |
Ao remate das escaleiras hai unha fonte da que manaba auga en abundancia. |
| Fonte |
A área recreativa remata nun estupendo miradoiro sobre o Cantábrico. |
| Miradoiro da área recreativa |
Na foto seguinte vemos a Punta do Perverso con moitas furnas: |
| Punta do Perverso |
Uns metros máis e remata este curto pero fermoso paseo. Vemos o Centro Cívico e o Pavillón de Cangas ao lonxe.
 |
| Paseo marítimo |
O Centro Cívico ou Centro Social de Cangas é o lugar que condensa a vida cultural, deportiva e social desta parroquia. Dotado de cafetería e dun amplo local no que se celebran bailes, actuacións teatrais, proxeccións cinematográficas e outros espectáculos, anima moitísimo os momentos de ocio da localidade e incluso da zona.
Ao pé do Centro Cívico hai un pavillón deportivo e as instalacións do campo de fútbol onde se desenrola a vida deportiva da parroquia.
 |
| Centro Cívico ou Centro Social de Cangas |
Pillo á dereita para cruzar a N-642 e pillo a estrada que vai a Ferreira, LU-162. |
| Cruce de estradas |
Deseguida vou torcer á esquerda. Agora sepárome do Camiño Natural do Cantábrico polo que vin ata agora.
 |
| Sinais do Camiño Natural da Ruta do Cantábrico |
Durante uns poucos metros vou en paralelo á vía de FEVE torzo despois á dereita. |
| Vías de FEVE |
Paso pola Cruz da Veiga, onde hai un cruceiro. Neste cruce, torzo á esquerda: |
| Cruz da Veiga |
Estou no Camiño Real, no barrio de Alemparte. Algo máis adiante, pillo á dereita, polo Camiño Granxas.
 |
| Alemparte |
Vou polo Camiño Granxas. Nesta zona hai poucas casas. |
| Camiño Granxas |
Desemboco na estrada local Alemparte-Vilamor e pillo á dereita.
Só uns poucos metros máis adiante, pillo un camiño á esquerda(este vai ser o único tramo sen asfalto que vou pisar)
 |
| Camiño |
Atraveso o Rego de Alemparte pola ponte que se ve:
 |
| Ponte do Rego de Alemparte |
A pesares de que estamos nunha época de bastante sequía, o rego leva bastante auga.
 |
| Rego de Alemparte |
Atraveso este prado. Os amieiros medran á beira do Rego de Alemparte.
 |
| Prado e amieiros |
Desemboco neste antigo camiño de carro:
 |
| Camiño |
No cruce seguinte, pillei primeiro á esquerda porque o camiño estaba rozado pero só son uns metros que levan a unha casa deshabitada. O Rego de Alemparte segue o seu percorrido por aí para logo ir desembocar á praia de Riosmar que vimos antes pero non se pode pasar. Ás beiras do Rego hai moita maleza que impide a marcha.
 |
| Camiños |
Este é o camiño que non ten saída.
 |
| Camiño sen saída |
Dou a volta e continuo ao pé deste pequeno souto.
 |
| Pequeno souto |
O fermoso camiño remata cando saio á estrada local, xa no barrio de Ribela.
 |
| Cruce en Ribela |
O barrio de Ribela está no alto e ten magníficas vistas sobre o Cantábrico.
 |
| Vistas dende Ribela |
Quero acceder á capela da Concepción e este camiño empedrado vaime levar a ela.
A capela da Concepción está nun lugar moi fermoso cunhas inmellorables vistas. Foi restaurada por fóra e por dentro por iniciativa dos veciños de Ribela que se senten moi vinculados a este santuario. Hoxe mesmo había dúas veciñas poñendo flores e limpando.
 |
| Capela da Concepción |
Vistas doutros barrios de Cangas e do mar Cantábrico dende a capela de Ribela.
 |
| Vistas dende a capela de Ribela |
Baixo da capela e pillo á dereita para voltar ao punto de inicio.
 |
| Vistas |
Atraveso unha ponte sobre as vías de FEVE outra vez:
 |
| Vías de FEVE |
E chego a este cruce coa N-642. Teño que ir de frente.
 |
| Cruce |
En Cangas vin nesta época moitos xardíns fermosos pero sen dúbida o que me pareceu máis fermoso foi o seguinte, xa chegando ao punto no que iniciei a ruta, na praia dos Xuncos.
Os últimos 400m. coinciden co traxecto da ida.
 |
| Un xardín que namora! |
Páxina web consultada:
https://galiciapuebloapueblo.blogspot.com/2022/12/paseo-por-la-costa-de-san-pedro-de.html
Ningún comentario:
Publicar un comentario